Кофе их уудаг хүмүүсийн биед өөх бага, булчин илүү байдгийг Финландын судалгаа тогтоожээ
Оулугийн их сургуулийн эрдэмтэд 2264 хүний өгөгдлийг шинжихэд биеийн жингийн индекс ижил байсан ч кофе их хэрэглэгчдийн хэвлийн өөх бага байв. Судлаачид өөрсдөө болгоомжтой хандахыг сануулж байна.
Бичсэн Mulen Battulga
Судалгаа ажиглалтын шинжтэй тул шалтгаан-үр дагаврыг тогтоогоогүй. Зураг: itsmulen
Финландын Оулугийн их сургуулийн эрдэмтэд Northern Finland Birth Cohort 1966 судалгаанд оролцсон 2264 хүний (дундаж нас 46) өгөгдлийг шинжлээд сонирхолтой хамаарал илрүүлснийг ScienceDaily мэдээлэв.
Кофе илүү их хэрэглэдэг хүмүүсийн биеийн жингийн индекс бага хэрэглэдэг хүмүүстэй ойролцоо байсан хэдий ч биеийн бүтэц нь өөр байжээ: нийт болон хэвлийн хэсгийн өөх бага, араг ясны булчингийн масс их байв. Мөн инсулины эсэргүүцэл, хоёрдугаар хэлбэрийн чихрийн шижинтэй холбоотой гэж үздэг салаалсан гинжит амин хүчлийн хэмжээ буурсан байсан.
Эрэгтэйчүүдэд ялгаа илүү тод гарчээ. Глюкоз-инсулины үзүүлэлт сайжирч, нийт болон биед шингэх тестостерон, түүнчлэн бэлгийн даавар холбогч глобулин (SHBG) өндөр байсан ч чөлөөт тестостерон бага зэрэг бага байв. Эмэгтэйчүүдэд гол төлөв SHBG өндөр, чөлөөт андроген бага байсан.
Судлаачид өөрсдөө болгоомжтой хандахыг сануулж байна: судалгаа ажиглалтын шинжтэй тул кофе эдгээр ялгааг шууд үүсгэсэн гэж батлах боломжгүй. Хоолны зөвлөмж болгохын өмнө хүн дээр хийх хөндлөнгийн оролцоотой судалгаа шаардлагатай гэжээ.